يوميات مدرسة كمبيوتر الحلقة العاشرة

الحلقة العاشرة....اهلاوي ولا زملكاوي


بقى المدرس اللى يعلن عن هويته و انتماءاته الكرويه فى البلد دى و خصوصاً قدام الطلبه يبقى مجنون رسمى
و الحمد لله انا كده من زمان
الجنان ده ابتدى فى اليوم اللى قبل ماتش الزمالك و الأهلى
انا داخله الفصل فى امانة الله و لقيت حلبة مصارعه منصوبه جوه الفصل
و العيال اول ما شافتنى هييييييييه الميس جات اهى
فى ايه يا بلاوى
الحقى يا ميس عمر و يوسف مقطعين بعض
و ماله سيبوهم لحد ما يخلصوا
و قولت ابعد من وشهم
جه واد يحوش بينهم قلت له سيبهم خالص لغاية ما يخلصوا
عايزة اشوف مين فيكم ارجل من التانى و هايطلع اللى تحت ايده بعاهه يا صايع يا متشرد منك ليه
انتوا عارفين اللى يغيظ ايه بقى
ان انا كنت فاكرة ان الطريقة دى ايه بقى هاتكسفهم و هايقوموا يفزوا اول ما اقول كده
بس العيال كملوا خناق
زى ما تكون فى بطيخة دخلت الفصل
بينى و بينكم خفت لا العيال تموت بعض بجد و اروح انا فى داهيه
و انا مش عامله حسابى خالص اتسجن اليومين دول
لسه بدرى على الاجازة و كنت مرتبالها برنامج تانى خالص
المهم عملت فيها جان دارك و قلت مبدهاش بقا
مادام الكلام اللى بالذوق مش جايب نتيجه تبقى العافيه هى اللى هاتجيب نتيجه
و روحت مشمرة و نازله عليهم بالخرطوم
طك طك طك و لا همنى افترا بقى
لحد ما العيال قاموا من فوق بعض بينهجوا و حالتهم حاله
روحت ماسكه واحد منهم من ودنه
و قلت له ايه ده يا زفت
راح الواد قليل الأدب منزل ايدى من على ودنه
ايدك بس يا ميس و افهمى الموضوع الأول
لأ مش هافهم حاجه و اوعى تمسك ايدى تانى و نزل ايدك جنبك
و روحت ماسكه ودنه تانى
استغفر الله العظيم طب يا ميس ثوانى بعد اذنك ما ينفعش تمسكى ودنى كده انا مش عيل
لأ عيل و عيل اهبل كمان و عايز تاخد بالجزمة
كده يعنى
اه كده
و روحت منزله ايدى من باب الأدب طبعا و لأن ايدى وجعتنى اصلى كنت مشعلقاها ودن الواد فوق اوى
و قلتلوا اتفضل احكى
و روحت زاغده التانى فى كتفه و انت بقى لسه حسابك جاى
طيب
احكى يا زفت
يا ميس يرضيكى برضه الواد المعفن ده يشتم ابو تريكة
يشتم مين يا حبيبى
ابو تريكة
ابو تريكه و ايه يعنى هو كان من بقية اهلك
نعم
نعم الله عليك يا حبيبى
راح قام واد من مكانه انتى زملكاويه ولا ايه يا ميس
اه زملكاويه عندك مانع
يا نهار اسوووووووووود الميس طلعت زملكاوية يا عيال
يالهوى يا ميس هو لسه فى حد زملكاوى
اه لسه عندك مانع بقى
اه طبعاً عندى
بله و اشرب ميته يا حبيبى
لأ أبله ايه حضرتك لازم تسمعينى كده غلط ما ينفعش و الله لازم تشجعى الأهلى
لازم ايه يا اخويا و انت مالك يا رذل اشجع مين احنا فى الكورة دلوقتى و لا فى المجزرة اللى كانت شغاله يا شوية تحف يا بهايم
راح الواد التانى الزملكاوى حبيب قلبى رد بمنتهى البراءة و الطيبة
يا ميس يا حبيبتى انا باقول رايى بمنتهى الصراحه و الأدب راح ماسك فى خناقى
ما انا عارفه يا حبيبى ما هما اصلهم جمهور عدوانى و عنيف
و روحت زاغداه فى صدره
بس برضه الكلام ده مش فى حصتى يا تحفه
حاضر يا ميس انا اسف
ادخل مكانك يالا و اللى حصل ده ما يتكررش تانى
راح الواد الأهلاوى جاى يدخل هو كمان
رايح فين
هادخل مكانى انا كمان
هو انا قلتلك ادخل
طب ما هو دخل
دخل لما اعتذر
اه بس انا ما باعتذرش لزملكاويه
نعم يا حبيبى ما بتعتذرش لأيه
ما باعتذرش لزملكاويه يا ميس
الكلام ده لو انا بالعب معاك فى الشارع لكن احنا هنا فى المدرسة
و روحت ماسكه الخرطوم و نزلت فيه ضرب
تصدقوا اتخيلت انى باضرب كل لاعيبة الأهلى و انا باضرب الواد ده و باضرب البطولات اللى خدوها مننا و باضرب الألقاب اللى اتحرمنا منها بقالنا سنين و باضرب شوبير منه لله
الواد ما عرفش يدافع عن نفسه راح جرى بره الفصل و وقف على الباب
روحت طالعه وراه و جيت امسكه لقيت الناظر ماسكه من قفاه
ايه ده يا ميس
البيه طلع من الفصل
طلع يعنى ايه تعالى هنا و جاى يضرب الواد
روحت شاده الواد من ايده و قلتلوا بعد اذنك يا مستر
فى ايه يا ميس هاضربهولك
و تضربه انت ليه هو انا كاتعه و لا اتشليت انا هاضربه
يا ميس الضرب ممنوع
يعنى هو ممنوع عليا و مش ممنوع على حضرتك
ايوه انا الناظر و لو ضربته مش هايشتكى لكن لو حضرتك ضربتيهم هايشتكوا
لا يا مستر و انا اقدر برضه دى لو موتتنى حتى مش هافتح بقى و راح غامزلى
ماشى يا عمر
شكرا يا مستر و بعد اذنك بقى ادخل يا عمر يا حبيبى
شوفتى ما خليتش سحس بومب يوقع بيننا ازاى
طب ما انا كمان ما هانش عليا اخليه يضربك
ما انا خدت بالى عشان كده عملت معاكى الواجب ده ادخل بقى
لما تعتذر الأول
لأ مش هاعتذر
تانى
خلاص حقك عليا يا قمر
ماشى يا سيدى ادخل بقى
و جه يوم الماتش و اتغلبنا حسبى الله و نعم الوكيل
و العيال كلها استلمونى بقى احسن يا ميس مش قولنالك ده اللى هايحصل
و اللى يقوللى حولى بقى شكلك بقى وحش
الا واد واحد جالى يقولى يا ميس انا اهلاوى بس كنت زعلان عشانك امبارح
يا راجل و زعلان ليه بقى ان شاء الله
عشان امتحان الشهر قرب و خفت تجيبيلنا امتحان زى الزفت انتقاما مننا
يا سلام
لأ بجد يا ميس افرضى اتجوزتى واحد اهلاوى هاتعملى ايه
و انا اتجوز اهلاوى ليه
نصيبك جه كده
يا ابنى انا هاسألوا اول ما يتقدملى قبل ما اسأله على اسمه و لو طلع اهلاوى هارفضه
طب افرضى طلعلك عيل اهلاوى
و العيل ده بقى انا هاتبناه من الملجأ ما انا اللى هاربيه
الله افرضى طلع بيحب الأهلى
لأ ما انا هاعلقلوا صور الزمالك فى كل حته و هاعلق له صورة ابو تريكه و اقوللوا هو ده اللى قتل جدك يا حبيبى و يتم ماما حبيبتك و ماما كانت بتحب جدو اوى
نعم
نعم الله عليك اطلع يا ابنى حصتك انت فاكرنى بالعب
و جالى واد زملكاوى يقولى يرضيكى اللى حصل امبارح ده
طب و انا ذنبى ايه هو انا كنت بالعب
لأ بس انتى قعدتى تقولى هانكسب و هانفوز و كده يعنى قعدتى تقاطعى فيها يا ميس
لأ و هو انا قاطعت بس؟ ده انا اللى قولت لعبد الواحد يتسطل و هو واقف فى الجون و قولت لهانى سعيد يتهطل و يسيب اللاعيبه تعدى و قولت لشريف اشرف و شيكابالا يتحولوا و ما يشوفوش الجون و انا اللى حطيت التشكيل المنيل اللى كان بيلعب و انا اللى باطفش المدربين

اقولك على حاجه؟؟ انا اللى اكلت الجبنه