يوميات مدرسة كمبيوتر الحلقة التاسعة

الحلقة التاسعة....نور ومهند


كان يوم ما طلعتلوش شمس يوم ما ابتدت المسلسلات التركى تتعرض فى التليفزيون
العيال زى ما تكون اتجننت خلاص
كل واحده من البنات عايزة مهند و اللى عايزة يحيى
و منها لله لميس اللى جننتلى الصبيان
ادخل فصول البنات التيكيت عليه صور مهند
الكشكول عليه صور مهند
حتى الاستيكرز اللى بيلزقوها جوه الكشكول ما بقتش باربى و الكلام الفارغ ده
كلها صور المحروس و الهانم فى حضنه
نيجى نتكلم مع بعض شويه شفتى يا ميس نور عملت ايه فى مهند امبارح
ادخل فصول الصبيان الاقى نفس الهبل و الاستيكرز و بصى يا ميس المزة الصاروخ دى و لميس دى جامده و خسارة فى يحيى جته البلا فى شنبه
و على طول كده فى الهبل ده كل حصة لغاية ما اتخنقت منهم
فى يوم كنا فى المعمل و كانت حصة بنات و خلصنا العملى و قلت لهم شوفوا لو عايزين نعمل حاجه جديدة
اه يا ميس ندخل على النت
طب ماشى بس ما حدش يدخل على حاجه غير لما اشوف الأول
ما انا اصلى مش باطمن لهم خالص
قلت لهم و لا اقولكم احنا ندخل على جوجل و نعمل سيرش على موضوع واحد كلنا مع بعض كده
أأمن برضه
طب يا ميس ok
عايزين تعملوا بحث على ايه بقى
نعمل فى الصور يا ميس
ماشى عايزين صور مين
قامت بنت زى الصاروخ مهند طبعاً يا ميس
راحت التانية لأ مهند ايه يحيى يا ميس
يخرب بيوتكم مهند ايه و يحيى ايه
ايوه يا ميس عايزين مهند
لأ يا ميس يحيى
راحت التانية ردت عليها انتى هبله يا بت يحيى ايه ده مهند زى القمر
قمر ايه انتى ما شوفتيش شنب يحيى
فرديت عليها شنب ايه يا بت
ده يجنن يا ميس
طب ما الصرصار شنبه قد كده يجنن هو كمان؟
يا ميس صرصار ايه انتى ما شوفتيش يحيى بيعامل لميس ازاى
و لا مهند شوفتيه يا ميس بيعامل نور ازاى هى دى الرجاله مش تقولىلى الواد مودى
مودى مين يا بنت
مودى بتاع 3 / 4
قامت بت منطورة من مكانها ماله مودى بقى يا حبيبتى
واد اهبل كده و فاكر نفسه حاجه و هو بارد اصلا
يا سلام يا اختى
اه
ليه مش احسن برضه من عمرو الليثى
و فجأه بقدرة قادر الخناقه ما بقتش على مهند و يحيى لأ بقت على مودى و عمرو
الله الله اردحوا لبعض اكتر يا متشرده انتى و هى
الله يا ميس مش شايفه اتكلمت ازاى على مودى
و هو كان من بقية اهلك
زميلى يا ميس و زى اخويا
اخوكى برضه
اه اخويا و متربيين مع بعض كمان
و حضرتك ايه موضوع عمرو ده كمان
زميلى يا ميس
ماشى يا حلوة
احنا كنا فى ايه منكم لله يا بعده
كنا هانعمل بحث على مهند
لأ يحيى
لأ مهند
لأ يحيى
بسسسسسسسسس لا ده و لا ده امشوا غوروا على الفصل الله يقطع مهند على يحيى فى ساعه واحده
و المهم بعد كده فى حصة الصبيان قلت لهم نعمل ايه النهارده مختلف بعد ما خلصنا الدرس
ندور فى الصور على مهند و يحيى يا ميس
اتارى البنات ولاد اللذين كانوا قايلينلهم
ايه ده انتوا كمان بتحبوا مهند و يحيى
لا يا ميس يمكن نلاقى صور حلوه كده ما انتى عارفه بقى
لا مش عارفه يا سيدى
فرد ولد رخم خلاص يا ميس احنا ندخل على الفيس توك ندور على عريس ما عندكش عريس يا كرومبو
ليه يا حلوه ما الفصل فيه 40 دكر مافيش واحد فيهم مالى عينك
ليه كده ده انا باهزر معاكى
الله ما انا كمان باهزر معاك
طب خلاص اختاريلى انتى عريس
يا واد استرجل جتها نيله اللى عايزة خلف زى خلفك ده انت لو ابنى كنت مت بحسرتى
يا ميس انتى تطولى تجيبى عيل قمر زيى
قمر انت ما فيش مرايا فى بيتكم يالا
لأ فيه و باشوفنى فيها قمر
ما هو يا اما انت احول يا اما مراية بيتكم مكسرة
يا ميس حرام عليكى
حرمت عليك عيشتك و اخرس بقى بدل ما اقطعك اربع تربع و اخلى كل ربع يتحسر على التلاته التانيين و يقول يا ريتنى كنت معاهم
ايه
جتك اواه ما سمعتش
لأ سمعت الله يسامحك
الله ياخدك و يريحنى منك
ماشى الله يسامحك برضه لانى عارف ان كل ده من ورا قلبك
طب اسكت بقى عشان احبك
حاضر
قام واحد تانى طب سيبينى افتح الايميل بتاعى
فقلت له تفتح الايميل تنيل بيه ايه هى مش متلقحه فى الفصل فوق ده انا حتى لسه شايفاها الصبح و هى بتتهزق على البنطلون اللى لابساه
اه ما انا مش هاقعد عشان اتكلم معاها
امال تتكلم مع مين انت تعرف حد غيرها و لا ايه
لا يا ميس اعرف حد غيرها ايه ده انا قاعد عشان اشوف ماما لو فاتحه
فاتحه ايه
الميل بتاعها
يا سلام
اه ما هى بتيجى من طابور العيش على الكمبيوتر على طول و الله قبل ما تفطر حتى
لا ياراجل طب و انت مش لسه سايب ماما فى البيت عايز منها ايه بقى
اشوفها يمكن عايزة خضار فاكهه جبنه اى حاجه اجيبها لها معايا و انا مروح
اقعد يالا مش هاتفتح حاجه
يا ميس بالله عليكى افتحه
الهى ربنا يفتح فى وشك 6 غرز يا بعيد
الهى على الأقل اخد اجازة و ارتاح من المدرسة
ادعوا معايا عليه يا عيال

ادعى انتى بس انتى يا ميس و احنا هانأمن وراكى

بس للأسف قبل ما الحق ادعى عليه الحصة خلصت