يوميات مدرسة كمبيوتر الحلقة الرابعة

ودي الحلقة الرابعة وهاتعجبكوا اوي....عيد الحب


مرت الأيام عليا فى المدرسة أسود من بعضها و الحمد لله لغاية ما جه يوم عيد الحب
طبعاً اليوم ده بيبقى احمر على الناس كلها
بس بصراحه حبايب قلبى خلوه يوم أسود من السواد
اليوم ده يا اخواتى ابتدا من الطابور
أولها مدرسة الموسيقى اللى فاكره نفسها ليلى مراد قعدت تنعر ( سورى تغنى ) و الحب ما لينا غيره و الله ما لينا غيره
و العيال شكلها طالعه من الأحداث أصلاً
و دى عماله تديها لغاية ما جابت لى صداع
و كان هاين عليا أطبق فى زمارة رقبتها عشان تخلص
لأ و كمان صاحب المدرسه منه لله قعد يدينا محاضره فى الحب و حب زميلك و حب الطلبه بتوعك و ياللا عاوز اشوف الحب
مش عارفه أوريله الحب ازاى ابن المجنونه ده
لأ و الأمر واحد زميلنا عامل زى درفة الدولاب مسك المايك فى الاذاعة على الصبح كده و على غيار الريق و الواحد لسه ما فطرش و قعد يمتعنا بصوته بيغنى بالدراع على فكرة مش عشان صوته حلو و العيال لازم غصب عنهم يصقفوا و على الله يقفش عيل ما بيصقفش يبقى يوم اللى خلفوه اسود
المهم خلص الطابور على خير بدون وقوع خسائر فى الأرواح
و انا و لله الحمد قدرت اتوازن بعد 2 كيتوفان و طلعت الحصة

الحصة الأولى كانت فى فصل البنات
دخلت و بعد سلامو عليكم و كل سنه و انتوا طيبين طبعاً لقيت العيال هايمانين قوى و لاحظت ان الغياب زياده شويه
فسألت على الغايبين دول
قالوا لى يا ميس عندهم النهارده راندفو
عندهم ايه يا اختى
راندفو يا ميس هو انتى ما عندكيش النهارده
اخرسى قطم رقبتك
اخرس ليه يا ميس
يا بت اخرسى خلينا فى الدرس
كلهم فى نفس واحد لأ النهارده مش عايزين درس بقى خلينا فى المود الحلو اللى احنا فيه
مود حلو ايه يا بت انتى و هيا طب و المنهج اعمل فيه ايه
يا ميس كبرى بقى
اكبر ايه باقول فيه زفت منهج لازم نخلصه
ما جتش من يوم بقى
فبصيت لهم و قولت لهم طب عايزين ايه يعنى
عايزين نقعد ما نعملش حاجه
طب خلاص ارغوا مع بعض بس بصوت واطى
و خلصت الحصة
و فى الفسحة كان عندى اشراف و طلعت عشان انزل العيال الحوش
و ربنا ما يوريكم يا مؤمنين
زى ما اكون دخلت الاتوبيس المكيف
العيال كانوا عايزين البوكس ييجى يلمهم مش مدرسين ينزلوهم
ادخل اجيب البنات من فصل الصبيان و اجيب الصبيان من فصل البنات
و الهدايا كانت بتتوزع كده عينى عينك
و واقفه مع واد لقيت فى ايده هدية
باقوله ايه دى يا احمد
لقيت بنت جايه بتأنججوا (ماسكة في دراعوا) و الله العظيم
و بتقولى يرضيكى يا ميس ما يجبش هديه لخطيبته
قولتلها يجيب لك ايه يا حبيبتى
هديه يا ميس
فباقوله و هى بقى اللى جايبالك الهديه
فقالى اه
قولتلها شكله بخيل يا بت و بيستقطعك و قمت مزعقلها و منزلاها الحوش
بالتفت ورايا لقيت بت واقفة مع واد فى فصل بتديله هديه روحت رايحالهم
قولت لها يا بت هو انا كل شويه اجيبك من فصل و بتدى الهديه لمين المرة دى محمود؟
فالواد زغرلها و قالى يا ميس بتجيبيها منين
قلتلوا لسه جايباها من 3/2 كانت مع أحمد عبد الله بتديله هديه ( ما حصلش كنت باضحك عليه )
انتى ايه جايبة عشر هدايا النهارده
فراح مبرألها و البت راحت مبرأه لى
و قالت له و الله ما حصل
قلت لها انتى بتكدبينى
فقالى يا ميس الكلام ده حصل
فمشيت و ما ردتش عليهم
و قعدت على كده لغايه الفسحة ما خلصت بازعق فيهم و الم فيهم من هنا و هنا
و دخلت بعد كده الفصل التانى وكان بنات برضه
و لقيت نفس حالة الفصل التانى و الهدايا و كده
بس لقيت بنت ماسكه كشكول سلك شكله تحفة
و كل شويه تكتب فيه كلمه و تقطعة و تكتب و تقطع و تكتب و تقطع
فالفضول مسكنى روحت بابص على اللى بتكتبه لقيتها بتكتب مودى
قلت لها الله يخرب بيتك يا بعيده انتى بتبوظى كشكول بـ 15 جنيه عشان الواد الأومليت ده
أه يا ميس
يا بت ده ما يستاهلش
بحبه
حبك برص يا هبله
الله يا ميس
الله ياخدك يا بعيده يا بت اتنيلى على خيبتك ده واد شكله غلط
راحت بصتلى و قعدت تكتب و تقطع تانى
فقلت لها حرام عليكى فلوس ابوكى اللى بتضيعيها دى شيلى الكشكول و روحى قطعيه هوا أوفر
و على أخر اليوم كان كل واد و بت نازلين شايلين هدايا

و انا لأ شوفتوا الفرسه